મોરબીનું નામ પડતાં જ સિરામિક ઇન્ડસ્ટ્રીઝ જ યાદ આવે પણ તાજેતરમાં સિરામિક ઇન્ડસ્ટ્રીના જ કારણે નવી મિલ્સ સ્થપાતાં મોરબી
પેપર મિલનું પણ હબ બનવા જઈ રહ્યું છે. સિરામિક ઇન્ડસ્ટ્રીઝમાં પેકેજિંગના કારણે પેપરની માંગ વધતાં હાલમાં આઠ મિલો સ્થપાઈ રહી છે અને આગામી એક વર્ષમાં મોરબીમાં વધુ પેપર મિલ આવી રહી છે. હાલમાં જે પેપરનું ઉત્પાદન થાય છે તે પણ અઢી ગણું થવાનો અંદાજ છે. આમ મોરબી આગામી દિવસોમાં સૌરાષ્ટ્રનું એકમાત્ર પેપર હબ તરીકે ઊભરી આવશે.
ગુજરાતમાં હાલમાં એકમાત્ર વાપીમાં જ મોટા પાયે પેપર ઉદ્યોગ વિકસ્યો છે. મોરબીમાં સિરામિક ઇન્ડસ્ટ્રીઝમાં ટાઇલ્સના પેકેજિંગમાં કોરૂગેટેડ અને ડુપ્લેક્સ પેપરની માંગ વધી રહી છે. મોરબીની અગ્રણી પેપર મિલ તીર્થક પેપર મિલના માલિક કિરીટભાઈ પટેલે ઇટીને જણાવ્યું હતું કે આજથી 11 વર્ષ પહેલાં મોરબીમાં એકમાત્ર પેપર મિલ હતી , જેમાં પ્રતિ દિન 20 ટન કાગળનું ઉત્પાદન થતું હતું. છેલ્લાં ત્રણેક વર્ષમાં સ્થપાયેલી આઠ મિલમાં આધુનિક મશીનોથી પ્રતિ દિન 600 ટન પેપરનું ઉત્પાદન થાય છે. મોરબીની પેપર મિલના અગ્રણીએ જણાવ્યું હતું કે 600 ટનની પ્રતિ દિન ક્ષમતામાં બીજી 800 ટનની ક્ષમતા ઉમેરતાં આગામી એક વર્ષમાં કુલ ઉત્પાદન ક્ષમતા 1,500 ટન થશે.
મોરબીની સિરામિક ઇન્ડસ્ટ્રીઝમાં પેપરની ડિમાન્ડને કારણે એન્જિનિયરિંગ ઉદ્યોગને પણ ઓર્ડર મળી રહ્યા છે. અમદાવાદની જેએમસી એન્જિનિયરિંગ કંપનીના ચેરમેન રજનીભાઈ પટેલે ઇટીને જણાવ્યું હતું કે વધુ ક્ષમતા ધરાવતી વિદેશી મશીનરીની માંગ હતી , હવે એ તમામ ઓટોમાઇઝેશન ભારતીય એન્જિનિયરિંગ કંપનીઓ આપી રહી છે. ભારતીય પેપર મિલ મશીનરીની માગ વિદેશમાં પણ વધી છે.
તેમાંય અમેરિકા તથા અન્ય દેશોમાં પોતાનું નેટવર્ક ધરાવતી અમારી કંપનીને મોરબીમાં નવા ઓર્ડર મળી રહ્યા છે , જેના કારણે પેપર મિલની હાલની સંખ્યામાં ધરખમ વધારો થાય તેમ છે. કિરીટભાઈએ કહ્યું હતું કે કંડલા પોર્ટ નજીકમાં જ હોવાથી અમે કાચો માલ આયાત કરીને અમારી કામગીરી કરી શકીએ તેમ છીએ. આનાથી પોર્ટ સેક્ટરનો વિકાસ થશે.
આ ઉપરાંત ઉત્તર ભારતની મિલો ઇન્ડિયન વેસ્ટ પર જ નભે છે. તેવા સંજોગોમાં વિદેશથી કાચો માલ મંગાવીને પેપર બનાવવો કિફાયતી છે. સિરામિક ટાઇલ્સમાં આકર્ષક પેકેજિંગના કારણે પેપરની ડિમાન્ડ તો રહે જ છે. આમ પેપરની માંગને કારણે પેપર મિલ બનાવતી એન્જિનિયરિંગ કંપનીઓને પણ ફાયદો થઈ રહ્યો છે.
Sorce By : http://gujarati.economictimes.indiatimes.com/articleshow/5234765.cms
http://www.morbilive.com | www.ahmedabadlive.com | www.jewellerygujarat.com | www.ideakaguru.com | www.freemydownload.com
Popularity: 33% [?]